Судската пракса покажува дека во Македонија постојат два вида судски процеси за навреда и клевета, една која се применува кога тужбите се однесуваат на „обични“ граѓани, и друга кога како странки во процесот имаме високи владини функционери. Тоа е носечкиот заклучок од дебатата што се одржа денес, 11.07.2014 година, во хотелот „Бест Вестерн Турист“ во Скопје, во организација на Центарот за развој на медиуми (ЦРМ) од Скопје.

На дебатата беа претставени наодите од Вториот периодичен извештај од следењето на судските процеси за навреда и клевета во кои се тужени новинари и медиуми, што го покрива периодот од 1 март до 15 јуни 2014 година, подготвен од Центарот за развој на медиуми.

Повеќето од учесниците се согласија дека проблемот не е лоциран во Законот за граѓанска одговорност за навредата и клеветата со кој тие две дела беа префрлени од кривичното во граѓанското законодавство, туку во неговата примена од страна на судиите и двата „аршини“ што се применуваат кога како странки во процесот се јавуваат високи владини и државни службеници и, од друга страна, обични граѓани.

Претставниците на невладините организации што работат на полето на заштита на човековите права не се согласија со тој став и наоѓаат неколку замерки поврзани со законскиот текст. Беше посочено, на пример, дека законот, затоа што предвидува ограничување на висината на можното обештетување за нанесена нематеријална штета само за новинарите во суштина е дискриминаторски кон сите останати граѓани.

Дебатата ја модерираше новинарот Саше Димовски, а како воведничари настапија адвокатот Филип Медарски, новинарите Јадранка Костова, главна уредничка на неделникот „Фокус“, Ацо Кабранов од информативната веб-страница Либертас.мк, претседателот на Здружението на новинарите на Македонија Насер Селмани, и Владимир Медарски од ЦРМ, кој го претстави извештајот.

Подетален извештај од денешната дебата ќе следува наскоро.